Women Deliver 2026 yatangaje abazatanga ibiganiro mbere mu nama mpuzamahanga y’uburinganire

Umuryango mpuzamahanga Women Deliver watangaje ku mugaragaro icyiciro cya mbere cy’abazavuga mu Nama Mpuzamahanga ya Women Deliver 2026 (WD2026), iteganyijwe kubera i Narrm (Melbourne) muri Ositaraliya kuva ku wa 27 kugeza ku wa 30 Mata 2026. Iyi nama izahuza abayobozi bakomeye ku isi mu rwego rwa politiki, imiryango mpuzamahanga, sosiyete sivile n’abaharanira uburinganire, mu gihe isi ikomeje guhura n’imbogamizi zikomeye mu guteza imbere uburenganzira bw’abagore n’abakobwa.

Mu bazitabira iyi nama harimo Senateri Katy Gallagher, Minisitiri wa Leta ya Ositaraliya ushinzwe Imari, Abagore, Abakozi ba Leta n’Imirimo ya Leta. Azitabira WD2026 azanye ubuyobozi bwo ku rwego rwo hejuru mu gihe iterambere ry’uburinganire riri guhura n’igitutu gikomeye hirya no hino ku isi. Katy Gallagher azwi nk’umwe mu bayobozi bagize uruhare rukomeye mu gushyira abagore mu nzego zifata ibyemezo, guteza imbere politiki zita ku buringanire no gushimangira umutekano w’ubukungu n’ubuzima bw’abagore.

Azifatanya n’abandi bayobozi barimo Ruth Cross Kwansing, Minisitiri wa Kiribati ushinzwe Abagore, Urubyiruko, Siporo n’Imibereho Myiza, akaba n’uhagarariye Ihuriro ry’Ibihugu byo mu Birwa bya Pacifique mu bijyanye n’Uburinganire n’Imibereho Rusange, ndetse na Michelle O’Byrne, Ambasaderi wa Ositaraliya ushinzwe Uburinganire ku rwego mpuzamahanga, uyoboye ingamba zo guteza imbere ubuyobozi bw’abagore mu karere ka Indo-Pacific.

Umunyacyubahiro Dr Fatima Maada Bio, Madamu wa Perezida wa Sierra Leone akaba na Perezida wa OAFLAD (Ihuriro ry’Abadamu ba Perezida bo muri Afurika), na we azatanga umusanzu we mu biganiro bigamije gukumira ihohoterwa rishingiye ku gitsina rikorerwa abana n’abagore, no gushakira ibisubizo abafashwe n’ingaruka zaryo ku rwego mpuzamahanga.

Iyi nama izanagaragaramo Julia Gillard AC, wahoze ari Minisitiri w’Intebe wa Ositaraliya akaba ari we mugore wa mbere wayoboye iki gihugu. Kwitabira kwe gufite igisobanuro gikomeye cyane, cyane ko hashize imyaka irenga icumi atanze ijambo ryamamaye ku isi ryanenze ivangura n’ihohoterwa rikorerwa abagore muri politiki. Kugaragara kwe muri WD2026 bigaragaza ko urugamba rwo kugera ku buringanire mu buyobozi no mu buzima rusange rutararangira.

Abagize Inama y’Ubutegetsi ya Women Deliver barimo Helen Clark, wahoze ari Minisitiri w’Intebe wa Nouvelle-Zélande, Phumzile Mlambo      Ngcuka    , wahoze  ayobora UN Women, na Tulika Srivastava, impuguke mu by’uburenganzira bw’abagore ku rwego mpuzamahanga, na bo bazitabira. Aba bose bahuriye ku guharanira uburinganire, uburenganzira bwa muntu, iterambere rirambye n’ubuyobozi bw’abagore.

Ku nshuro ya mbere mu mateka y’iyi nama, akarere ka Oceanic Pacific ni ko kazaba kayakiriye ku rwego rw’akarere, kagire n’uruhare runini mu ngingo zizaganirwaho. Aka karere kari mu tugira ingaruka zikomeye z’ihindagurika ry’ikirere, ubusumbane n’ishoramari ridahagije ku bagore n’abakobwa, ariko kakaba karimo n’imbaraga zikomeye z’abaharanira uburinganire, Abasangwabutaka n’urubyiruko ruyoboye impinduka.

Abandi bazavuga barimo Antoinette Braybrook AM, umuyobozi wa Djirra uharanira kurwanya ihohoterwa rikorerwa abagore b’Abasangwabutaka, Noelene Nabulivou wo muri Fiji, umuyobozi w’umuryango DIVA for Equality, na Dr June Oscar AO, impirimbanyi ikomeye y’uburinganire ku Basangwabutaka bo muri Ositaraliya.

Hazanitabira abayobozi b’imiryango mpuzamahanga nka Dr Diene Keita wa UNFPA, Dr Maliha Khan, Umuyobozi Mukuru wa Women Deliver, ndetse na Dr Anita Zaidi wo muri Gates Foundation, uzaganira ku ishoramari rishingiye ku bimenyetso mu guteza imbere abagore n’abakobwa.

Inama ya Women Deliver 2026 izahuza abayobozi ba guverinoma, imiryango sivile, abashakashatsi n’abaterankunga bo hirya no hino ku isi, baganire ku ntambwe imaze guterwa, ku mbogamizi zigihari no ku ngamba nshya zo kugera ku buringanire bufatika kandi burambye.

 

By:Florence Uwamaliya