Uwamahoro Nadege yashyizwe mu bagore 100 b’indashyikirwa ku Isi bashimwe na FAO
Umunyarwandakazi Uwamahoro Nadege, washinze ikigo Braimpire Ltd akaba n’Umuyobozi Mukuru wacyo, yatoranyijwe mu bagore 100 b’indashyikirwa ku Isi bashimwe n’Ishami ry’Umuryango w’Abibumbye ryita ku Biribwa n’Ubuhinzi (FAO), kubera uruhare bagira mu guteza imbere ubuhinzi, urwego rw’ibiribwa n’icyaro.
Uwamahoro yashyizwe ku rutonde rw’abagore 100 bafite ibikorwa by’indashyikirwa mu bijyanye n’ubuhinzi no guteza imbere icyaro ruzwi nka “FAO 100 Women Heroes in Agrifood Systems and Rural Development”.
Uwamahoro na bagenzi be bashimiwe mu muhango wihariye mu Ihuriro Mpuzamahanga ry’Ibiribwa, ryateraniye u cyicaro cya FAO i Roma mu Butaliyani, kuva ku wa 12 kugeza ku wa 16 Ukwakira 2026.
Umuyobozi Mukuru wa FAO, QU Dongyu, yashimye ubuyobozi bwe, ubwitange n’impinduka ibikorwa bye byagejeje ku baturage, agaragaza ko ari byo byatumye aza mu batoranyijwe mu bakandida baturutse hirya no hino ku Isi.
Ubutumwa yohererejwe bwagaragazaga ko ibikorwa bya Uwamahoro byatanze umusanzu mu kuzamura imibereho y’abatuye icyaro, kubungabunga umutungo kamere no gufungurira abandi amahirwe.
Uwamahoro amaze imyaka isaga 10 mu bikorwa byo guteza imbere ubucuruzi bw’ibikomoka ku buhinzi, kwagura amasoko no gufasha abahinzi bato muri Afurika.
FAO imugaragaza nk’Umunyarwandakazi wa mbere wandikishije ikigo mu rwego rw’ubucuruzi bukorerwa mu Isoko Rusange rya Afurika, AfCFTA. Binyuze muri Braimpire Ltd, ahuza abahinzi n’amasoko yo mu karere n’ayo ku rwego mpuzamahanga, yohereza mu mahanga ikawa, icyayi, urusenda, imbuto n’imboga.
Iki kigo kimaze gufasha abahinzi bato barenga 15.000, abenshi muri bo bakaba ari abagore, urubyiruko n’abantu bafite ubumuga. Ibikorwa byacyo byibanda kandi ku kongerera agaciro umusaruro, kugabanya igihombo kiba nyuma yo gusarura no guhanga amahirwe arambye yo kwiteza imbere.
Gutoranywa kwa Uwamahoro kwabaye nyuma y’isuzuma ryakorewe abakandida 609 batanzwe n’abanyamuryango ba FAO 131. Buri gihugu cyari cyahawe umubare ntarengwa w’abakandida gishobora gutanga, hashingiwe ku mubare w’abaturage bacyo.
FAO yabanje kugenzura niba abakandida bujuje ibisabwa, hanyuma abayobozi bayo bakuru barabasuzuma banabashyira ku rutonde hakurikijwe uko batoranyijwe. Abageze ku rutonde rw’ibanze bongeye kuganirwaho mu byiciro bibiri, harebwa ubuziranenge bw’ibikorwa byabo n’uko ibice bitandukanye by’Isi bihagarariwe. Urutonde rwa nyuma rwemejwe na Komite y’Ubuyobozi Bukuru ya FAO.
