Portugal yahagaritse Cristiano Ronaldo

Ishyirahamwe ry’Umupira w’Amaguru muri Portugal (FPF) ryatangaje ko ryahagaritse rutahizamu w’Ikipe y’Igihugu, Cristiano Ronaldo, igihe kitazwi kubera imyitwarire idakwiriye aheruka kugaragaza.

Cristiano Ronaldo aherutse kuva mu mwiherero w’Ikipe y’Igihugu ya Portugal mu buryo butunguranye, avuga ko Umutoza Jorge Jesus atubahirije ibyo bari bumvikanye inshuro ebyiri, ari na byo byamugejeje ku cyemezo cyo gutaha.

Ni icyemezo kitashimishije ubuyobozi bw’umupira w’amaguru mu gihugu cye, ndetse na we yiyemerera ko ibyo yakoze ari amakosa, yemera kuzirengera ibihano yafatirwa.

Kuri uyu wa Gatandatu, tariki ya 10 Ukwakira 2026, Ishyirahamwe ry’Umupira w’Amaguru muri Portugal, FPF, yatangaje ko hafashwe umwanzuro ku cyemezo uyu mukinnyi usanzwe ari kapiteni wayo yafashe.

Ryagize riti “Ibijyanye n’imyitwarire ya Cristiano Ronaldo dos Santos Aveiro, bifitanye isano n’ubunyamwuga buke, byafatiwe umwanzuro ku wa 9 Ukwakira 2026. Yahagaritswe by’agateganyo mu gihe hagitegerejwe ikindi gihano cyisumbuyeho mu gihe iperereza rizaba rirangiye.”

Ronaldo w’imyaka 41, ni umwe mu bakinnyi bakomeye kandi bamaze igihe kinini mu Ikipe y’Igihugu ya Portugal yatangiye gukinira mu 2003.

Cristiano Ronaldo yahagaritswe igihe kitazwi mu Ikipe y’Igihugu ya Portugal