Ethiopie: Ingabo za Leta zigiye gufata umurwa mukuru wa Tigray

October 2, 2026 uwamaliya Florence

Abarwanyi bashyigikiye leta ya Ethiopie bavuze ko begereye Mekelle, umurwa mukuru wa Tigray, mu gihe hakomeje kwiyongera ubwoba bw’uko imirwano ishobora gukara kubera ibyo guhagarika umubano hagati ya Eritrea na Ethiopie.

Umutwe wa Tigray Peace Forces, ushyigikiye leta, watangaje kuri Facebook ko wafashe umujyi wa Milazat, uri mu bilometero 20 mu majyepfo y’uburasirazuba bwa Mekelle.

Amashusho yakwirakwijwe ku mbuga nkoranyambaga agaragazaga abarwanyi mu ikamyo y’ubururu bavuga cyane bati “Mekelle! Mekelle!”

Ingabo za Ethiopie n’abarwanyi bazishyigikiye zihutiye kwigarurira ibice bya Tigray kuva imirwano itangiye mu cyumweru gishize. Zirwana n’ihuriro riyobowe na TPLF, ishyaka riyobora ako karere. Imirwano yo muri iki gihe ni yo ikaze kuva intambara yabaye hagati ya 2020 na 2022 irangiye.

Abasesenguzi bafite impungenge ko imirwano yakwambuka imipaka. Leta ya Ethiopie ishinja Eritrea, Sudani na Misiri gushyigikira uyu mutwe huriro, ariko ibyo bihugu byose birabihakana.

Ku wa 1 Ukwakira 2026, Ethiopie yafunze ambasade yayo muri Eritrea iyishinja ibikorwa by’urwango n’ubushotoranyi. Yanategetse abadipolomate icumi ba Eritrea kuva muri Ethiopie mu masaha 48. Eritrea yahise ihagarika umubano wose ushingiye kuri dipolomasi. Ibyo bihugu byarwanye hagati ya 1998 na 2000, byongera kuzahura umubano mu 2018.

Abaturage babiri ba Mekelle babwiye Reuters ko amabanki n’amaduka byari bifunze ku wa Gatanu, kubera gutinya imirwano. Umudipolomate yavuze ko abayobozi bakuru ba TPLF bavuye muri uwo mujyi, kandi ko intambara ishobora gukomeza n’iyo ingabo za leta zawufata.

Mu 2020, ingabo za leta zafashe Mekelle mu kwezi kwa mbere kw’intambara, ariko TPLF iwisubiza nyuma y’amezi arindwi. Umuyobozi wayo, Debretsion Gebremichael, yemeye ko ingabo za leta zafashe ibice bimwe bya Tigray, avuga ko ingabo ze zizagaba ibitero byo kuwisubiza.

Ethiopie yirukanye kandi umudipolomate wa Misiri, na Misiri yirukana umujyanama wa ambasade ya Ethiopie. Komisiyo y’Umuryango wa Afurika Yunze Ubumwe yasabye ibyo bihugu na Eritrea kwirinda kwenyegeza intambara.

TPLF yifatanyije n’indi mitwe itandatu ishaka gukuraho ubutegetsi bwa Abiy. Ku wa Gatatu nijoro, humvikanye urusaku rw’ibisasu biremereye i Addis Ababa. Umuntu ufitanye isano n’iryo huriro yavuze ko ari ibitero bya drone byagabwe ku cyicaro cy’ingabo za leta n’ahandi.