Burundi: Mu masaha 48 urukiko ruravuga umwanzuro ku banyamakuru bafunze
Abanyamakuru bane n’umushoferi wabo b’ikinyamakuru Iwacu cyo mu Burundi uyu munsi bagejejwe imbere y’urukiko rwa Bubanza, nyuma yo kumvwa umwanzuro uratangwa mu masaha 48 ari imbere nk’uko bivugwa n’uruhande rw’abaregwa.
Aba banyamakuru bararegwa icyaha cyo ‘ubufatanyacyaha mu guhungabanya umutekano w’igihugu’.
Christine Kamikazi, Agnès Ndirubusa, Térence Mpozenzi, Egide Harerimana n’umushoferi wabo Adolphe Masabarakiza bafashwe kuwa kabiri ushize mu ntara ya Bubanza batara amakuru ku mirwano y’ingabo za leta n’inyeshyamba.
Antoine Kaburahe uyobora ikinyamakuru Iwacu yabwiye BBC ko ejo kuwa mbere n’uyu munsi kuwa kabiri aba baregwa bumviswe n’urukiko rwa Bubanza bari kumwe n’abunganizi batatu babo.
Nyuma yo kumvwa uyu munsi, avuga ko babwiwe ko umwanzuro utangazwa mu masaha 48.
Bwana Kaburahe avuga ko ibyo aba banyamakuru bakoze ari ibyo umunyamakuru wese ukora umwuga we neza yakora.
Ati: “Mu gihe hari amakuru, umunyamakuru arahaguruka akagenda, akabaza, agatohoza, nicyo bakoze rero…Nibaza ko aho nta kosa na rimwe ririmo mu gihe agiye kumugaragaro atihishe”.
Bwana Kaburahe avuga ko iki kinyamakuru kimaze imyaka 11 gikora mu Burundi, kitwararika amategeko y’igihugu, ubu ngo ni ubwa mbere bashinjwe ibyaha bimeze gutya.
Ati: “Nta kintu na kimwe bakoze batari basanzwe bakora, ahubwo byari gutangaza iyo ayo makuru [y’igitero] avugwa bakaguma bicaye i Bujumbura, none bari kuvuga iki bari kwandika iki?”
Ubutabera mu Burundi nta makuru arambuye bwatanze ku biregwa aba banyamakuru, umuvugizi w’igipolisi mu cyumweru gishize yatangaje ko iperereza riri gukorwa.
Imiryango mpuzamahanga iharanira uburenganzira n’ubwisanzure bw’itangazamakuru ivuga ko aba banyamakuru bafunzwe kubera umwuga wabo, igasaba ko barekurwa.
