CAS yatangiye kumva ubujurire bwa Sénégal na Maroc ku gikombe cya CAN 2025
Kuri uyu wa 8 Ukwakira 2026, Urukiko Nkemurampaka rwa Siporo ku Isi (CAS), rwatangiye kumva ubujurire bwa Sénégal ku cyemezo cyahaye Maroc Igikombe cya Afurika cya 2025.
Iburanisha riri kubera i Lausanne mu Busuwisi, ryatangiye Saa Tatu n’Igice za mu gitondo, aho impande zombi zagejeje ku rukiko impamvu zishingiraho zisaba ko icyemezo cyafashwe n’Impuzamashyirahamwe y’Umupira w’Amaguru muri Afurika (CAF) gihinduka.
Impaka zishingiye ku mukino wa nyuma w’Igikombe cya Afurika cya 2025 wahuje Sénégal na Maroc ku wa 18 Mutarama 2026, ukarangira amakipe yombi anganya 0-0 mu minota 90 isanzwe.
Mu minota 30 y’inyongera, Sénégal yatsinze igitego ku munota wa 94, gitsinzwe na Pape Gueye, umukino urangira ari 1-0.
Mbere y’aho, habaye impaka zikomeye ku cyemezo cy’umusifuzi Jean-Jacques Ndala cyo gutanga penaliti ya Maroc. Iki cyemezo cyakurikiwe n’imvururu, bituma abakinnyi ba Sénégal bava mu kibuga mu rwego rwo kwigaragambya, nubwo nyuma bagarutse umukino ugakomeza.
Penaliti yatanzwe icyo gihe nyuma y’ikosa ryakozwe na El Hadji Malick Diouf kuri Brahim Díaz, ariko uyu Munya-Maroc ntiyabashije kuyibyazamo igitego.
Nyuma y’umukino, Maroc yajyanye ikirego muri CAF, isaba ko Sénégal ihabwa ihanirwa kuva mu kibuga mu gihe umukino wari ugikomeje.
Ku wa 17 Werurwe 2026, Akanama k’Ubujurire ka CAF kahinduye ibyari byavuye mu mukino, gategeka ko Sénégal yatsinzwe ku mpamvu z’amategeko. Maroc yahise ihabwa intsinzi y’ibitego 3-0 ndetse n’Igikombe cya Afurika cya 2025.
Sénégal ntiyemeye icyo cyemezo, maze ku wa 25 Werurwe 2026 ijuririra CAS, isaba ko icyemezo cya CAF gihindurwa ndetse n’ibyavuye mu mukino bikongera kubahirizwa.
Ni muri urwo rwego CAS yatangiye kuri uyu wa Kane kumva impande zombi, aho buri ruhande rwagaragaje ibimenyetso n’impamvu rushingiraho.
Nubwo iburanisha ryatangiye, CAS ntiyatangaje ko icyemezo gihita gisohoka kuri uyu wa Kane. Urukiko ruzabanza gusuzuma ibitekerezo by’impande zombi ndetse n’ibimenyetso byatanzwe, mbere yo gufata umwanzuro wa nyuma.
Muri Werurwe, Sénégal yajuriye muri CAS, isaba gusubizwa Igikombe cya Afurika yambuwe na CAF