Kigali: Abashoramari, abaguzi b’inguzanyo za karubone n’abayobozi baturutse mu bihugu 45 bahuriye mu nama ya CMAS 2026

Abahagarariye ibihugu 45 byo ku isi, birimo ibihugu 24 byo muri Afurika, bateraniye i Kigali mu nama ya Carbon Markets Africa Summit (CMAS) 2026, igamije guteza imbere ishoramari n’ubufatanye mu isoko ry’inguzanyo za karubone ku mugabane wa Afurika.

Iyi nama iri kubera muri Kigali Convention Centre kuva ku wa 13 kugeza ku wa 15 Ukwakira 2026, ihurije hamwe abatanga ibiganiro barenga 100, abashoramari, abaguzi n’abatanga inkunga basaga 50, za guverinoma 20 zo muri Afurika ndetse n’abateza imbere imishinga ya karubone barenga 40.

Iyi nama ibaye mu gihe isoko rya karubone rikomeje kwitabirwa n’ibihugu, ibigo by’imari n’abashoramari bashaka gushyigikira ibikorwa bigabanya imyuka ihumanya ikirere, binatanga umusanzu mu iterambere ry’ubukungu.

Ihuriro rya CMAS 2026 rirafasha ibihugu bya Afurika n’abafite imishinga guhura n’abashoramari n’abaguzi mpuzamahanga, hagamijwe gushaka inkunga, guteza imbere imishinga mishya no kubaka ubufatanye bushobora gutuma isoko rya karubone ritanga umusaruro ugaragara.

Ibrahim Shelleng, Umujyanama Mukuru wa Perezida wa Nigeria ku bijyanye n’imari y’ikirere n’imikoranire n’abafatanyabikorwa, yavuze ko iyi nama ari amahirwe yo kongera uruhare rw’Abanyafurika mu kugena icyerekezo cy’iri soko.

Yagize ati: “Iri huriro ry’abakinnyi bakomeye mu isoko rya karubone muri Afurika rigaragaza ko umugabane ugomba kugira uruhare mu kugena ejo hazaza h’iri soko, rishingiye ku byifuzo by’Abanyafurika kandi rikagirira Afurika akamaro.”

Ishoramari n’imishinga irambye

Mu bikorwa biteganyijwe harimo ibiganiro byihariye bizahuza abashoramari, abaguzi n’abateza imbere imishinga, kugira ngo barebere hamwe uburyo bwo kubona igishoro no gushyiraho ubufatanye bushya.

Abafite imishinga irenga 40 bazagaragaza ibikorwa mu nzego zitandukanye, zirimo kubungabunga ibidukikije, ubuhinzi burambye, gucunga imyanda, guteka hifashishijwe ingufu zisukuye no gukuraho imyuka ya karubone mu kirere.

Maggie Kinyanjui, ushinzwe gushaka imishinga muri Afurika mu kigo Climate Impact Partners, yavuze ko gukorana hagati y’abateza imbere imishinga, abaguzi n’abashoramari ari ingenzi mu kubaka isoko rya karubone rikomeye.

Yashimangiye ko Afurika idakwiye kugarukira ku kugira uruhare muri iri soko gusa, ahubwo ikwiye no kurigiramo ijambo, rigakurura igishoro kandi inyungu zikagera ku bihugu no ku baturage bakora ibikorwa birengera ikirere.

Guhuza amategeko mpuzamahanga n’amahirwe ya Afurika

Iyi nama ibaye mu gihe amategeko n’uburyo mpuzamahanga bugenga isoko rya karubone bikomeje kunozwa. Urwego rwa UNFCCC rushinzwe kugenzura uburyo bwo gutanga inguzanyo za karubone buzwi nka Paris Agreement Crediting Mechanism, ruri gukora inama yarwo ya 23 i Bonn mu Budage.

Ibyo biganiro bifite akamaro kuri Afurika, kuko bishobora kugira ingaruka ku buryo imishinga yo kuri uyu mugabane yemerwa, igatanga inguzanyo za karubone kandi ikurura abaguzi n’abashoramari.

CMAS 2026 yateguwe na Minisiteri y’Ibidukikije y’u Rwanda, ifatanyije na gahunda ya Loni ishinzwe iterambere (UNDP) na Banki Nyafurika Itsura Amajyambere (AfDB), mu gihe Development Bank of Southern Africa (DBSA) ari umufatanyabikorwa mu kwakira iyi nama, AUDA-NEPAD ikaba umufatanyabikorwa w’inzego z’Afurika.

Abateguye iyi nama bavuga ko intego atari uguhuriza abantu hamwe gusa, ahubwo ari ugushyiraho umusingi w’ubufatanye, ishoramari n’ibikorwa bifatika bizafasha Afurika kubyaza umusaruro amahirwe ari mu isoko rya karubone.

By: Florence Uwamaliya