RDC iherutse gufunga umuhungu wa Bozizé

October 8, 2026 imena

Inzego z’iperereza rya gisirikare muri Repubulika Iharanira Demokarasi ya Congo, RDC, zataye muri yombi Kévin Bozizé, umwe mu bahungu ba François Bozizé wahoze ari Perezida wa Repubulika ya Centrafrique, nyuma aza kurekurwa amaze iminsi itatu afunzwe i Kinshasa.

Kévin Bozizé amaze imyaka 13 aba muri RDC nk’impunzi, kuva ubutegetsi bwa se bwahirima i Bangui. Yavuze ko uburyo yafashwemo bwari bukomeye, mu gihe inzego z’umutekano zamukekagaho kuba afitanye imikoranire n’abahoze ari abayobozi mu ngabo za Centrafrique.

Uyu mugabo yavuze ko ku wa Gatanu ushize, ahagana saa yine za mu gitondo, ubwo yari hafi y’agace ka Plateaux des Batéké, muri Komini ya N’sele i Kinshasa, yafashwe n’abantu bivugaga ko ari abakozi b’iperereza rya gisirikare.

Yahise ajyanwa mu kigo cya gisirikare aho yabajijwe ku byo inzego z’umutekano zavugaga ko ari umugambi wo kwifatanya n’abandi mu gutegura ihirikwa ry’ubutegetsi muri Centrafrique.

Kévin Bozizé yahakanye ibyo birego, avuga ko ari ibihimbano bidafite ishingiro. Nyuma yaho, yajyanywe ku cyicaro gikuru cy’iperereza rya Polisi, ahamara amajoro atatu afunzwe.

Bozizé yavuze ko Ishami ry’Umuryango w’Abibumbye ryita ku Mpunzi, HCR, hamwe na Komisiyo y’Igihugu ishinzwe Impunzi muri RDC, bagize uruhare mu gutuma arekurwa.

Nyuma yo kurekurwa, yavuze ko afite impungenge ku mutekano we ndetse ko atekereza gusaba ubuhungiro bwa politiki mu kindi gihugu kiri kure ya Centrafrique.

Kugeza ubu, HCR n’ubuyobozi bwa RDC ntacyo baratangaza kuri iki kibazo.

Kévin Bozizé ntiyamenyekanye cyane nka murumuna cyangwa mukuru we Jean-Francis Bozizé, ushakishwa n’ubutabera kubera uruhare ashinjwa mu mikorere y’umutwe w’inyeshyamba watangijwe mu 2020 na se, François Bozizé.

François Bozizé na we asanzwe ashakishwa ku rwego mpuzamahanga, aho akekwaho ibyaha birimo ibyibasiye inyokomuntu.