Amerika Irateganya Kongera Kugaba Ibitero Bikomeye Kuri Iran Mbere y’Amatora

Ibinyamakuru byo muri Amerika, Axios na The Atlantic, bivuga ko Minisiteri y’Ingabo ya Amerika (Pentagone) iri gutegura uburyo bwo kongera kugaba ibitero bikomeye kuri Iran, bishobora kuba mbere y’amatora yo hagati mu manda ya Perezida ateganyijwe ku itariki ya 3 Ugushyingo.

Axios, ishingiye ku bayobozi ba Amerika baganiriye na yo, ivuga ko Pentagone yahaye ubuyobozi bw’ingabo za Amerika mu Burasirazuba bwo Hagati, buzwi nka CENTCOM, amabwiriza yo kurangiza imyiteguro yo kongera gukora ibikorwa bikomeye bya gisirikare kuri Iran.
The Atlantic na yo ivuga ko Ibiro bya Perezida wa Amerika byasabye Pentagone gutegura uburyo butandukanye bwo kugaba ibitero ku birindiro bya Iran, bushobora gukoreshwa mbere y’ayo matora.
Icyakora, Axios ivuga ko iryo tegeko ridagaragaza igihe ibitero bishobora gutangirira. Perezida Donald Trump na we ngo ntarafata icyemezo cya nyuma cyo kongera gutera Iran.
The Atlantic ivuga ko Trump ashaka ko ibiciro bya peteroli bigabanuka, ndetse no kugaragaza ko hari intambwe ikomeye yatewe mu ntambara na Iran mbere y’uko Abanyamerika bajya gutora.
Amakuru Axios yakuye ku bayobozi ba Amerika n’aba Israel avuga ko ibitero bishobora kugabwa mbere y’amatora yo muri Amerika, cyangwa mbere y’amatora ya Israel ateganyijwe kuba hasigaye icyumweru kimwe ngo amatora yo muri Amerika abe.
Axios ivuga ko mu gihe ibikorwa bikomeye bya gisirikare byaba bisubukuwe, bishobora kuba birimo ibitero byinshi by’ibisasu ku bigo bya Iran bitanga ingufu, ku bikorwa remezo n’imiyoboro y’ingenzi, ndetse no ku bice bikorerwamo gahunda za nikleyeri.
Icyakora, bamwe mu bayobozi bavuga ko ibitero bishobora kuba mbere y’amatora, nubwo amahirwe y’uko bibaho atari menshi.