Amatora ya Perezida muri Haïti yazahajwe n’amabandi yasubitswe
Haïti imaze imyaka yugarijwe n’urugomo rw’amabandi yitwaje intwaro yasubitse amatora yari ateganyijwe mu mpera z’uyu mwaka nk’uko byatangajwe ku wa 6 Ukwakira 2026.
Haïti ntirongera gukora amatora kuva mu 2016, ndetse Perezida wayo wa nyuma Jovenel Moïse wishwe mu 2021 ntarasimburwa.
Icyiciro cya mbere cy’amatora ya Perezida n’ay’abagize Inteko Ishinga Amategeko cyari giteganyijwe ku wa 13 Ukuboza, na ho icya kabiri kikaba ku wa 21 Gashyantare 2027.
Itangazo ry’Akanama k’Agateganyo gashinzwe Amatora rigira riti “Igihe cyari giteganyijwe cyo kwiyamamaza cyasubitswe.”
Icyakora iri tangazo ntirivuga indi tariki amatora azaberaho, ahubwo rivuga ko ingengabihe “izatangazwa vuba bishoboka.”
Ako kanama kavuga ko ingengabihe izavugururwa hashingiwe ku “bisabwa mu bya tekiniki no mu ishyirwa mu bikorwa ry’amatora, ndetse n’ibikenewe kugira ngo ibyiciro bitandukanye byayo bigende neza”.
Icyakora, kagaragaza ko kwandikisha abazatora bikomeje.
Umwe mu bagize ako kanama wavuganye na AFP atifuje gutangazwa amazina, yemeje ko “itariki ya 13 Ukuboza itazakurikizwa”, yongeraho ati “Turi gutegura ingengabihe nshya.”
Kugeza ku wa Kabiri, abantu ibihumbi 769 gusa ni bo bari bamaze kwiyandikishiriza gutora, kuva icyo gikorwa cyatangira ku wa 20 Nyakanga.
Haïti isanzwe yarazahajwe n’ubukene kurusha ibindi byose byo ku migabane y’Amerika, imaze igihe ihanganye n’ibibazo bya politiki, ubukungu n’umutekano.
Ibintu byarushijeho kuzamba mu myaka ya vuba, ubwo amabandi yitwaje intwaro yayogozaga ibintu akirara mu baturage, agashimuta abantu, agafata ku ngufu no kwinjiza abana mu mitwe yayo.
Mu baturage bacyo bagera kuri miliyoni 11, hafi miliyoni 1,5 bavuye mu byabo kubera urugomo, bahungira imbere mu gihugu, nk’uko Ishami Mpuzamahanga ryita ku Bimukira ribitangaza.
Ishami ry’Umuryango w’Abibumbye ryita ku Burenganzira bwa Muntu, ryavuze mu cyumweru gishize ko urugomo rw’udutsiko twitwaje intwaro muri Haïti rumaze guhitana cyangwa gukomeretsa abantu nibura 5.700 muri uyu mwaka, mu gihe abagore n’abakobwa barenga 1000 bafashwe ku ngufu.
Imibare yakusanyijwe n’ubutumwa bw’Umuryango w’Abibumbye muri Haïti kugeza ku wa 11 Nzeri, inagaragaza ko hakozwe ibikorwa 230 byo gushimuta abantu.
Amabandi yitwaje intwaro akomeje kujujubya Haïti