Ikigo gikomeye cyo muri Aziya cyinjiye ku isoko ry’u Rwanda; Uwihanganye wabaye Minisitiri ari mu bayobozi bacyo

Ikigo Raffles Family Office cyo muri Aziya cyagiranye amasezerano n’Urwego rw’Igihugu rw’Iterambere (RDB), agamije gukurura ishoramari rya miliyoni amagana z’amadolari ya Amerika mu mishinga itandukanye y’iterambere mu Rwanda, irimo iy’ubukerarugendo n’ibikorwaremezo bifitanye isano n’irushanwa rya Formula 1.

Ikigo Raffles Family Office (RFO) cyo muri Aziya cyagiranye amasezerano y’ubufatanye n’Urwego rw’Igihugu rw’Iterambere (RDB), agamije gukurura ishoramari mu mishinga itandukanye y’iterambere ry’u Rwanda, irimo iy’ubukerarugendo, ibikorwaremezo n’indi ifitanye isano n’irushanwa rya Formula 1.

Aya masezerano yatangajwe ku wa 22 Ukwakira 2026, akaba agamije guteza imbere ishoramari ry’abikorera mu Rwanda, binyuze mu guhuza imishinga y’iterambere ry’igihugu n’abashoramari bafite ubushobozi bw’imari buhambaye bo muri Aziya, Afurika no mu bindi bice by’Isi.

Raffles Family Office yashinzwe mu 2016, ikaba ifite icyicaro i Hong Kong no muri Singapore. Ni ikigo gitanga serivisi zo gucunga imitungo n’ishoramari by’abantu n’imiryango ifite umutungo mwinshi.

Gifasha abakiliya bacyo kumenya aho bashora amafaranga, kuyacunga, kurinda imitungo yabo no gutegura uko izasigirwa abazabakomokaho.

Binyuze muri ubu bufatanye, RFO izifashisha abakiliya bayo n’abashoramari ku rwego mpuzamahanga mu kumenyekanisha amahirwe y’ishoramari ari mu Rwanda, hagamijwe gukurura miliyoni amagana z’amadolari mu myaka iri imbere.

Aya masezerano kandi azafasha guhuza ishoramari ry’abikorera ku rwego mpuzamahanga n’imishinga y’ishoramari u Rwanda rushyize imbere, bityo habeho amahirwe yo gushora imari mu bikorwa by’iterambere ry’ubukungu bw’igihugu mu gihe kirekire.

Mu mishinga izamurikirwa abashoramari harimo iyubakwa ry’Ikibuga cy’Indege Mpuzamahanga cya Kigali kiri i Bugesera, amahoteli, ibikorwa by’ubukerarugendo, imyidagaduro, imitungo itimukanwa n’ibindi bikorwaremezo.

Hari kandi amahirwe y’ishoramari mu mushinga wa Airport City, ibikorwa byo kwakira abantu no kubacumbikira, ndetse n’izindi serivisi zizakenerwa mu mijyi n’uduce dutandukanye tw’igihugu.

Ishoramari riteganyijwe rizibanda cyane ku mishinga yo mu Bugesera, Kigali, Musanze no mu tundi duce tw’u Rwanda.

Formula 1 iri mu mishinga yitezweho gukurura ishoramari

Aya masezerano aje nyuma y’itangazwa rya gahunda y’imyaka 10 ijyanye no kwakira irushanwa rya Formula 1 African Grand Prix mu Rwanda, guhera mu ntangiriro z’imyaka ya 2030.

Biteganyijwe ko iri rushanwa rizabera ku muhanda mushya uzubakwa hafi y’Ikibuga cy’Indege Mpuzamahanga cya Kigali kiri i Bugesera, ukazaba waragenewe by’umwihariko amasiganwa y’imodoka.

Iri rushanwa niriramuka ribereye mu Rwanda, rizaba ari irya mbere rya Formula 1 ribereye ku Mugabane wa Afurika kuva mu 1993.

Mu itangazo ryashyizwe ahagaragara na Raffles Family Office, hagaragajwe ko Formula 1 ishobora gufungura amahirwe mashya y’ishoramari mu nzego zitandukanye, aho kuba umushinga ugarukira gusa ku bikorwa by’amasiganwa y’imodoka.

Muri izo nzego harimo ubwikorezi bwo mu kirere, amahoteli, ubukerarugendo, imyidagaduro, imitungo itimukanwa na serivisi zitandukanye zizakenerwa n’abazitabira iri rushanwa.

Iri shoramari kandi ryitezweho guteza imbere ibikorwaremezo bizakenerwa mu bikorwa by’ubukerarugendo n’ubucuruzi, bikazafasha mu guteza imbere ubukungu bw’igihugu mu gihe kirekire.

Umuyobozi Mukuru wa Raffles Family Office, Chi Man Kwan, yavuze ko bishimiye gukorana na RDB mu mushinga ufite uruhare mu kwagura amahirwe y’ishoramari mu Rwanda.

Ati “Ubu bufatanye bufite akamaro kanini bushyiraho uburyo bushimishije bwo gufasha abakiliya bacu gushakisha amahirwe y’ishoramari mu nzego u Rwanda rwashyize imbere mu iterambere ryarwo.”

Mu bindi yatangaje, Chi Man Kwan yavuze ko bishimiye amahirwe yo guhuriza hamwe ubushobozi bw’ikigo ayoboye n’imishinga RDB ifite, kugira ngo amafaranga y’abashoramari mpuzamahanga abyazwe umusaruro mu mishinga ifitiye Afurika akamaro mu gihe kirekire.

Yagaragaje ko Raffles Family Office izifashisha abakiliya bayo n’abashoramari ikorana na bo, ihuze ubushobozi bwabo bw’imari n’imishinga y’iterambere iri mu Rwanda.

Ku ruhande rwa RDB, Umuyobozi Mukuru wayo, Jean-Guy Afrika, yavuze ko Formula 1 ari umwe mu mishinga ikomeye u Rwanda rwifuza kubakiraho amahirwe mashya y’ishoramari.

Ati “Formula 1 ni umusemburo w’icyerekezo kinini cy’ishoramari mu Rwanda. Uruhare rw’abikorera ni ingenzi mu buryo twifuza kugera kuri icyo cyerekezo, aho amahirwe y’ishoramari atazagarukira ku muhanda w’amasiganwa gusa, ahubwo azagera no ku bwikorezi bwo mu kirere, amahoteli, ubukerarugendo, imyidagaduro, imitungo itimukanwa na serivisi zitandukanye.”

Jean-Guy Afrika yashimangiye ko ubufatanye na Raffles Family Office buzafasha RDB kubona umufatanyabikorwa ufite ubunararibonye mu gukurura ishoramari ry’abikorera.

Yagaragaje ko biteze ko ubu bufatanye buzafasha mu kurema amahirwe mashya y’ubucuruzi, guhanga imirimo no kuzamura agaciro k’ibikorwa by’ubukungu, haba mu gihe cy’irushanwa rya Formula 1 na nyuma yaryo.

Raffles Family Office yatangiye gukorera mu Rwanda mu ntangiriro za 2026, ubwo yafunguraga ibiro byayo i Kigali, mu rwego rwo kwagura ibikorwa byayo ku Mugabane wa Afurika.

Kuva icyo gihe, iki kigo cyatangiye kugirana ibiganiro n’abashoramari bashobora gushora imari mu Rwanda, ndetse gitegura ingendo z’abashoramari bifuza gusura igihugu kugira ngo bamenye imishinga ihari n’amahirwe yaboneka.

Muri Nzeri 2026, Raffles Family Office yashyizeho Jean de Dieu Uwihanganye, wabaye Umunyamabanga wa Leta muri Minisiteri y’Ibikorwaremezo ndetse na Ambasaderi w’u Rwanda muri Singapore, mu mwanya ushinzwe amasoko akizamuka no guteza imbere ubucuruzi.

Uyu mwanya ufite aho uhuriye no kwagura ibikorwa by’iki kigo mu masoko mashya, harimo no gushakisha amahirwe y’ishoramari no guhuza abashoramari n’imishinga iboneka mu bihugu bitandukanye.

Ubufatanye bwa Raffles Family Office na RDB bugamije gukurura imari y’abikorera mu mishinga y’iterambere ry’u Rwanda, aho ishoramari rishobora gufasha mu kubaka ibikorwaremezo, guteza imbere ubukerarugendo, guhanga imirimo no kwagura ibikorwa by’ubucuruzi.