Abanye-Congo baba mu mahanga bashyigikiye FRN ya Kabila

Umuryango DPC (Diaspora Plurielle Congolaise) watangaje ko ushyigikiye ishingwa ry’umutwe wa FRN, uhamagarira Abanye-Congo baba muri Repubulika Iharanira Demokarasi ya Congo no mu mahanga kuwushyigikira.

Mu itangazo ryashyizwe hanze n’uyu muryango uhuriza hamwe Abanye-Congo baba mu mahanga, wavuze ko RDC iri mu bihe bikomeye birangwa n’ibibazo bya politiki, umutekano, ubukungu n’imibereho y’abaturage.

Wagaragaje ibibazo byugarije RDC birimo ruswa, imicungire mibi y’umutungo kamere, kunyereza umutungo wa Leta, ifaranga rikomeje gutakaza agaciro, imiyoborere mibi no kutubahiriza Itegeko Nshinga n’andi mategeko.

DPC yagaragaje ibindi bibazo birimo icy’umutekano mu burasirazuba bwa RDC, kurenga ku burenganzira bwa muntu n’imvugo z’urwango, ivuga ko hari ivangura rikorerwa Banyamulenge, Abatutsi b’Abanye-Congo n’abavuga Igiswahili.

Iri huriro ryatangaje ko muri urwo rwego, ryakiriye neza ishingwa rya FRN, rivuga ko riyibona nk’uburyo bwo gukangurira Abanye-Congo kongera gushyira imbere ubumwe bw’igihugu, amahoro, kubahiriza Itegeko Nshinga, demokarasi n’uburenganzira bw’ikiremwamuntu.

Uyu muryango washimangiye ko FRN itagomba gufatwa nk’umushinga w’umunyapolitiki umwe gusa, by’umwihariko Joseph Kabila wayoboye RDC, ahubwo ko ikwiye kuba urubuga ruhuza Abanye-Congo.

Wagize uti “Diaspora Plurielle ishimangiye ko ishyigikiye ishingwa rya FRN.”

DPC kandi yahamagariye Abanye-Congo kwita ku byo FRN ishyira imbere no kugira uruhare mu kubaka igihugu ishingiye ku mahame y’Itegeko Nshinga, by’umwihariko ingingo ya 64 ivuga ku nshingano y’abaturage yo kurwanya umuntu cyangwa abantu barenga ku mategeko.

Iri tangazo ryashyizweho umukono n’abantu 16 barimo Perezida wa DPC, Pitchou Shomongo, ndetse n’abandi bayobozi n’abanyamuryango b’uyu muryango.