Kenya: Abanduye Ebola bageze kuri barindwi
Minisiteri y’Ubuzima ya Kenya yatangaje ko abandi bantu bane basanganywe virusi ya Ebola yo mu bwoko bwa Bundibugyo, barimo abakozi batatu bo mu rwego rw’ubuzima bitaye ku murwayi wa mbere wagaragaye muri iki gihugu. Ibi byatumye abamaze kwemezwa ko bayanduye bagera kuri barindwi.
Undi murwayi mushya ni umugabo wo mu muryango w’umurwayi wa bonetse bwa mbere, witabye Imana. Minisiteri y’ubuzima yatangaje ko uwo mugabo yari yarashyizwe mu kato kuva ku wa 6 Ukwakira.
Aba ni bo bantu ba mbere bizwi ko banduriye Ebola imbere muri Kenya, nyuma y’uko umurwayi wa mbere ageze muri iki gihugu avuye muri Repubulika Iharanira Demokarasi ya Congo ku wa 3 Ukwakira.
Minisiteri y’Ubuzima ivuga ko hafi ya bose bahuye n’uwo murwayi bamaze kuboneka no gushyirwa mu kato, kandi ko nta bimenyetso by’uko virusi iri gukwirakwira mu baturage.
Abakozi batatu bo mu rwego rw’ubuzima bayanduye ni abagabo babiri bafite imyaka 29 na 35, n’umugore ufite imyaka 32. Bitaga ku murwayi wa mbere ku wa 3 n’uwa 4 Ukwakira, bakaba bari mu kato kuva ku wa 9 Ukwakira.
Abo barwayi bashya uko ari bane bagaragaje ibimenyetso ndetse bemezwa ko banduye basanzwe bari mu kato.
Minisiteri yatangaje ko umurwayi wa kabiri n’uwa gatatu bari bagaragaye mbere bamerewe neza kandi ko ubuvuzi bwo kubafasha guhangana n’ingaruka z’indwara buri gutanga umusaruro.
Mu bantu 130 bari bashyizwe ku rutonde rw’abahuye n’abarwayi, 128, bangana na 98,5%, bari bamaze kuboneka no gushyirwa mu kato. Minisiteri yavuze ko iki gipimo kirenze icya 85% gifatwa ku rwego mpuzamahanga nk’igikenewe kugira ngo uruhererekane rw’ubwandu ruhagarare.
Ubwandu bwagaragaye muri Kenya bufitanye isano n’icyorezo cya Ebola cyo muri RDC, kikaba ari icya kabiri gikomeye kurusha ibindi byigeze kwandikwa. Kimaze kwanduza abantu barenga 9.000 no guhitana abarenga 4.000.
Nta rukingo cyangwa imiti byemejwe byo kurwanya Ebola yo mu bwoko bwa Bundibugyo.
Umurwayi wa mbere wagaragaye muri Kenya ni umugabo wari umaze hafi ukwezi arwariye muri RDC mbere yo kujya muri Uganda akoresheje umuhanda, akahava yerekeza i Nairobi mu ndege ku wa 3 Ukwakira. Yitabye Imana ku wa 5 Ukwakira.
Kugera muri Kenya kwe kwateye impungenge ku buryo bwo gusuzuma abagenzi ku mupaka wa RDC na Uganda, wari warafunzwe kuva muri Gicurasi, ndetse no ku Kibuga Mpuzamahanga cy’Indege cya Jomo Kenyatta i Nairobi.
Minisiteri yatangaje ko ibikorwa byo gushakisha abandi bantu babiri bahuye n’abarwayi bikomeje.