Uwahoze mu ngabo za Amerika yarasiwe muri RDC
Yasuwe : https://igihe.com/tc/trafficcounter.php?id_article=257248
Yavuzweho:https://igihe.com/number_of_comments.php?id_article=257248
Tim Kennedy wabaye umusirikare mu mutwe w’ingabo zidasanzwe muri Leta Zunze Ubumwe za Amerika n’umukinnyi ukomeye w’imikino njyarugamba ikomatanyije, yarasiwe muri Repubulika Iharanira Demokarasi ya Congo mu kwezi gushize.
Amakuru yatangajwe n’ibinyamakuru bitandukanye avuga ko Tim yarasiwe mu gico yatezwemo n’abitwaje intwaro tariki ya 17 Nzeri 2026, cyahitanye uwahoze mu mutwe w’ingabo zidasanzwe za New Zealand, Justin Conaglen, undi mucanshuro bari kumwe arakomereka.
Kennedy w’imyaka 47 yakinnye muri shampiyona ya Amerika y’imikino njyarugamba (UFC) nyuma yo gusezera mu mutwe w’ingabo z’iki gihugu uzwi nka ‘Green Beret’, aho yari mudahusha.
Umunyamakuru ukurikirana iby’intambara, Robert Young Pelton, yabwiye ikinyamakuru New Zealand Herald ko Tim na bagenzi be babiri bari mu kazi ko kurinda ibirombe by’ubucukuzi bw’amabuye y’agaciro muri RDC.
Akazi ka Tim na bagenzi be gashingiye ku masezerano Leta ya RDC yagiranye n’Umunyamerika wabaye umucancuro ukomeye, Erik Prince, ajyanye no kugenzura ibirombe by’amabuye y’agaciro mu bice bitandukanye by’igihugu.
Ku wa 8 Ukwakira 2026, Brent Tucker wahoze mu mutwe w’ingabo zidasanzwe za Amerika uzwi nka Delta Force, na we yemeje aya makuru abinyujije mu kiganiro cye yise ‘Tier 1 Live’.
Brent yagize ati “Navuga ko Tim Kennedy ntekereza ko warashwe inshuro enye, yari kumwe n’umusirikare udasanzwe w’Umunya-New Zealand. Yarapfuye, ntakiriho. Uwa gatatu yarashwe kenshi. Bari batatu, babiri barashwe bikabije, ku bw’ibyago umwe apfira muri Congo.”
Yasobanuye ko ikintu kibabaje ari uko umuntu ukora nk’umucanshuro, yaba akora ibyiza cyangwa ibibi, aba adashobora gufashwa byihuse n’abasirikare ba Amerika mu gihe agize ibyago kuko aba atari mu kazi yoherejwemo n’igihugu.
Ati “Iyo ukora nk’umucanshuro, nta bushobozi bw’igisirikare cya Amerika uba ufite. Bumwe mu bushobozi burenze abantu, iyo bibaye bibi, hari uba akwiye kuza, akabikora byihuse. Ariko ibyo ntibyabaye nyuma yo kuraswa.”
Tim yamaze amasaha menshi ategereje ubufasha, aho abuboneye, yoherezwa mu bitaro muri Amerika.
Brent yabwiye abamukurikira ko umuryango wa Tim udashaka kuvuga iyi nkuru ariko ko we ayihagazeho kubera ko yayivuganyeho n’abantu benshi yizeye ko bayizi.