Kenya: Abantu 10 bashyizwe mu kato kubera Ebola

Inzego z’ubuzima muri Kenya zatangaje ko abantu 10 bahuye n’umugabo wapfuye azize Ebola bashyizwe mu kato, mu gihe hashakishwa abandi 57 bahuye na we.

Uyu mugabo w’Umunya-Kenya wari uvuye muri Repubulika Iharanira Demokarasi ya Congo, yapfiriye mu bitaro i Nairobi ku wa Mbere. Ni ubwa mbere Kenya igaragayemo Ebola.

Umuyobozi w’Ikigo cya Afurika gishinzwe kurwanya no gukumira indwara, Africa CDC, Jean Kaseya, yavuze ko uwo murwayi yari amaze ukwezi arwaye, ariko anyura mu mijyi itandukanye ntawe utahuye uburwayi bwe.

Yabwiye BBC ko yavuye i Buta, ajya i Kisangani mu modoka, ahafatira indege yerekeza i Beni. Nyuma yagiye muri Uganda mu modoka, ahafatira indege imujyana i Nairobi.

Kaseya ati “Ni ibihe bimenyetso yari afite? Kuki uburwayi bwe butatahuwe?”

Patrick Amoth wo muri Minisiteri y’Ubuzima ya Kenya yavuze ko bishoboka ko uwo murwayi yafashe imiti yatumye ibimenyetso bitagaragara, ageze mu rugo mwenewabo yamujyanye mu bitaro. Yashyinguwe ku wa Kabiri hakurikijwe amabwiriza y’ubwirinzi.

Abategetsi basabye abaturage kudakuka umutima, batangaza ko bakajije igenzura ku bibuga by’indege no ku mipaka.

Icyakora, Dr Denis Miskellah, uhagarariye sendika y’abaganga, yavuze ko yabonye intege nke mu igenzura ku mipaka ihuza Kenya na Uganda na Tanzania, ndetse no ku kibuga gikuru cy’indege.

Perezida William Ruto yavuze ko amatsinda akurikirana indwara n’atabara byihuse yatangiye ibikorwa. Umuvugizi we yatangaje ko abagenzi barenga ibihumbi 650 basuzumwe, hapimwa n’ibipimo 267.

Ibitaro bine byateguriwe kwakira abarwayi ba Ebola, birimo Nairobi Hospital, aho uwo murwayi yapfiriye.

Ebola yandurira mu guhura n’amatembabuzi y’umubiri w’uwanduye, nk’amaraso cyangwa ibirutsi. Icyorezo cyatangiye muri RDC muri Gicurasi 2026 cyatewe n’ubwoko bwa virusi ya Bundibugyo, budakunze kuboneka. Nta rukingo cyangwa ubuvuzi byemejwe byabwo, nubwo igerageza rikomeje.

Muri RDC, abantu barenga 4110 bamaze guhitanwa na Ebola muri uyu mwaka. Uganda na yo yapfushije abantu babiri, ariko Ishami ry’Umuryango w’Abibumbye ryita ku Buzima ryatangaje muri Kanama ko icyo gihugu kitakirangwamo Ebola.

Uganda yavuze ko uwo murwayi yahanyuze atarengeje amasaha 24, kandi atagaragazaga umuriro ukabije igihe yahavaga.

Kaseya yavuze ko Africa CDC ikorana n’ibihugu byo mu karere mu gushimangira ubutabazi, anashimangira ko ku mipaka nta buryo bwihuse bwo gupima Ebola buhari.

Yagize ati “Ngomba kubisobanura neza, nta buryo bwo gupima Ebola dufite. Harebwa gusa umuriro.”

Yavuze ko gupima umuriro mu mubiri bidatanga icyizere gihagije, kuko imiti ishobora kugabanya umuriro.

Abantu 10 bahuye n’uwishwe na Ebola bashyizwe mu kato