AFC/M23 yongeye gufata Lumbishi na Numbi nyuma y’amasaha hafashwe na Wazalendo

Ibice bya Lumbishi, Shanje, Kavumu na Numbi muri Teritwari ya Kalehe, mu Ntara ya Kivu y’Amajyepfo byongeye kwigarurirwa n’abarwanyi ba AFC/M23 nyuma y’amasaha make Wazalendo zihigaruriye.

Kuwa Kabiri, itariki 6 Ukwakira 2026, nibwo ihuriro ry’ingabo zirwanira ubutegetsi bwa Kinshasa, cyane cyane inyeshyamba za Wazalendo na FDLR, ryari ryafashe Umujyi wa Shanje, agace ka Gasenda n’udusozi twa Bukumba, muri Teritwari ya Kalehe.

Mbere yo guhunga ziva muri ibi bice, Kuri uyu wa Gatatu, itariki ya 7 Ukwakira 2026, guhera saa yine n’igice za mu gitondo, izi nyeshyamba ziganjemo FDLR, zabanje gukora ibikorwa byo gusenya mu gace ka Shanje no mu nkengero zaho muri Teritwari ya Kalehe.

Itangazo ryashyizwe ahagaragara n’Ihuriro AFC/M23 rivuga ko amazu menshi y’abasivili yatwitse hamwe n’isoko ryaho.

Amakuru mashya aravuga ko amazu agera kuri 60, harimo na za kiosque, yatwitse muri centre ya Shanje, ndetse haba no gusahura no kwiba inka, harimo n’amashyo abiri y’inka, bivugwa ko ari aya Gen. Gabriel Amisi Kumba, uzwi ku izina rya Tango Four.