Seninga Innocent yahawe akazi ko gutoza Musanze FC

Umutoza Seninga Innocent wari umaze amezi make nta kazi afite, yamaze gusinyira Musanze FC amasezerano y’imyaka ibiri nk’umutoza mukuru, asimbuye Ahmed Adel Abdelrahman Ibrahim, umunya-Misiri uherutse kwirukanwa muri iri kipe.

Kuri Twitter ya Musanze FC bamaze kwemeza ko Seniga Innocent ari umutoza mukuru w’iyi kipe.

Banditse ngo “Seninga Innocent yagizwe umutoza mukuru wa Musanze FC mu myaka ibiri iri imbere amahirwe masa umutoza wacu.’’

Seninga wagizwe umutoza wa Musanze FC yaherukaga gutandukana na Etincelles kubera ikibazo cy’amikoro.

Mu mikino icyenda ya shampiyona uyu mutoza yatoje Etincelles, yatsinzemo itatu, inganya ibiri itsindwa ine, yayisize ku mwanya wa cyenda mu makipe 16, ariko Shampiyona yasojwe igeze ku mwanya wa 13.