Mohamed Morsi yashyinguwe i Cairo

Spread the love

Mohamed Morsi wigeze kuyobora Misiri yashyinguwe mu gace ka Madinat Nasr gaherereye mu Burasirazuba bw’Umurwa Mukuru i Cairo.

Morsi wapfuye kuri uyu wa Mbere yashyinguwe kuri uyu wa Kabiri nkuko umwe mu bamwunganiraga mu mategeko yabitangarije AFP.

Abdelmoneim Abdel Maksoud, Umunyamategeko wa Morsi yagize ati “Yashyinguwe i Madinat Nasr ashagawe n’umuryango we. Amasengesho yabereye mu bitaro bya gereza ya Tora aho yaguye kuri uyu wa Mbere.”

Morsi w’ishyaka Muslim Brotherhood ryaciwe mu Misiri, yapfuye kuri uyu wa Mbere nyuma yo kwitabira iburanisha ryabereye mu rukiko rw’i Cairo kuri uyu wa Mbere.

Yashinjwaga ibyaha birimo kumena amabanga y’igihugu no gufatanya n’umutwe wa Hamas ubarizwa muri Palestine mu mugambi wo guhungabanya umutekano wa Misiri.

Umwe mu bakozi b’urukiko yavuze ko uyu musaza w’imyaka 67 yaguye igihumure imbere y’inteko iburanisha.

Yafunzwe mu 2013 nyuma yo guhirikwa ku butegetsi na Abdel Fattah al-Sissi wari umugaba w’ingabo.

Mu itangazo umutwe wa Hamas washyize hanze, wavuze ko ubabajwe n’urupfu rwa Morsi nyuma y’urugamba rwo kwitangira abaturage be ndetse n’abanya Palestine.

Perezida wa Turikiya, Recep Tayyip Erdogan, wari inshuti ikomeye ya Morsi na we yamaganye urwo rupfu, ashinja ubutegetsi bwa Misiri kuba inyuma yarwo.

Mu ijambo ryanyujijwe kuri televiziyo, Erdogan yagize ati“Amateka ntazibagirwa abagizi ba nabi bamushyize mu buroko, bakamutesha umutwe bashaka kumwica.”

Kuva Morsi yahirikwa ku butegetsi nyumwa y’umwaka umwe atowe, umubano wa Turikiya na Misiri wabaye mubi cyane.

Muri Mata 2015 nibwo Morsi n’abandi bantu 21 bakatiwe gufungwa imyaka 20 kubera uruhare mu mvururu hagati y’abamushyigikiye n’uruhande rw’abataravugaga rumwe n’ubutegetsi bwe zabaye mu 2012. Yapfuye akiburana ku bindi byaha yashinjwaga.

Leave a Reply

Your email address will not be published. Required fields are marked *