Minembwe: Ibitero bya drones byibasiye Gakenke n’ibice bihegereye

Kuri uyu wa Gatandatu, itariki ya 25 Mata 2026, hagati ya 9h15 na 12h00, ingabo z’ihuriro ry’ubutegetsi bwa Kinshasa zagabye ibitero by’urugomo bitigeze bibaho mu bice bituwe cyane bya Gakenke muri Minembwe nk’uko byatangajwe n’umutwe wa AFC/M23 mu itangazo ryawo.

Iri tangazo rivuga ko “Ibi bikorwa, byaranzwe no gukoresha indege zitagira abaderevu za kamikaze, drones za KT-6, n’imbunda ziremereye, byerekana ingamba nkana z’iterabwoba zibasira abaturage.”

Uyu mutwe ukomeza uvuga ko kuva hashyirwa umukono ku itangazo rihuriweho ryo ku itariki ya 17 Mata 2026, i Montreux hagati y’ubutegetsi bwa Kinshasa na AFC/M23, ibintu byarushijeho kumera nabi cyane kandi biteye ubwoba.

Ubutegetsi bwa Kinshasa burashinjwa gukaza umurego mu byaha bya gisirikare, butesha agaciro imbaraga Umuryango Mpuzamahanga ukomeje gushyira mu gushaka igisubizo cya politiki mu makimbirane yo muri Repubulika ya Demokarasi ya Congo.